អាមេរិក៖ ក្លិបបាល់ទាត់អាមេរិក Inter Miami នៃក្របខណ្ឌលីគកំពូលអាមេរិក (Major League Soccer) បានប្រកាសកាលពីថ្ងៃសុក្រ ទី១៧ ខែកញ្ញាម្សិលមិញនេះថា អតីតកីឡាករក្លិបបិសាចក្រហម Manchester United និងជាអតីតកីឡាករ Captain ក្រុមជម្រើសជាតិអង់គ្លេស David Beckham បានបង្កើននូវការវិនិយោគ និងភាគរយកាន់តែច្រើនក្នុងនាមជាសហស្ថាបនិក និងប្រធានក្លិបបាល់ទាត់ស្ថិតនៅរដ្ឋ Florida នេះ។

ក្លិបបាល់ទាត់ Inter Miami ដែលបានបង្ហាញខ្លួន និងចូលរួមប្រកួតរដូវកាលដំបូងក្នុងក្របខណ្ឌកំពូលអាមេរិកកាលពីរដូវកាលមុន បានបញ្ជាក់ក្នុងសេចក្តីប្រកាសព័ត៌មានមួយថា សហប្រធានរួមមាន David Beckham និងបងប្អូន Jorge Mas និង Jose Mas ទាំងពីរនាក់ បានបញ្ចប់កិច្ចពិភាក្សាក្នុងការទិញផ្តាច់យកក្លិបបាល់ទាត់នេះពីបុគ្គលពីរនាក់ផ្សេងទៀតរួមមាន Marcelo Claure និង Masayoshi Son។

គួរបញ្ជាក់ថា អតីតខ្សែបម្រើក្លិបអង់គ្លេស Man Utd និងក្លិបអេស្ប៉ាញ Real Madrid ខាងលើនេះ ទទួលបានសិទ្ធិពិសេសក្នុងការបញ្ចុះតម្លៃសិទ្ធិក្លិបបាល់ទាត់ក្នុងក្របខណ្ឌ MLS ដែលលក្ខខណ្ឌនេះបានចងភ្ជាប់ក្នុងកិច្ចសន្យាមួយ គ្រាដែលកីឡាកររូបនេះបានយល់ព្រមផ្ទេរមកលេងនៅទឹកដីអាមេរិកជាមួយក្លិប Los Angeles Galaxy នៅឆ្នាំ២០០៧។ ដោយឡែក ចាប់អារម្មណ៍ពីក្លិប Inter Miami វិញ ហាក់មិនទាន់មានទំរង់គួរឱ្យចាប់អារម្មណ៍ណាមួយនៅឡើយទេ បើធៀបទៅនឹងលទ្ធផលរដូវកាលដំបូងនេះ ពោលគឺនៅក្រៅតំបន់ East-Conference ដោយនៅសល់មួយប្រកួតក្នុងដៃ៕